មានព័ត៌មានចចាមអារ៉ាមមួយចំនួនបានលើកឡើងពាក់ព័ន្ធនឹងអនាគតរបស់អ្នកចាត់ការ Mauricio Pochettino នៅក្លឹប Tottenham។
អ្នកចាត់ការសញ្ជាតិអាហ្សង់ទីនរូបនេះបំពេញតួនាទីបានល្អ ចាប់តាំងពីពេលដែលលោកប្ដូរមកពីក្លឹប Southampton ហើយបានដឹកនាំក្រុមមួយនេះឡើងដល់ក្នុងចំណោមក្រុម៣ ដែលឈរនៅកំពូលតារាងដល់ទៅ ៣រដូវកាលជាប់គ្នាទៀតផង។
នាពេលថ្មីៗនេះ លោក Pochettino មានព័ត៌មានជាប់ពាក់ព័ន្ធនឹងការផ្ទេរទៅក្លឹប Manchester United ប៉ុន្តែខ្លួនលោកផ្ទាល់បានបញ្ចប់ពាក្យចចាមអារ៉ាមមួយនេះដោយខ្លួនឯងកាលពីដើមសប្ដាហ៍នេះ។
ប៉ុន្តែអតីតកីឡាកររបស់ក្លឹប Spurs មួយរូប គឺកីឡាករ Dimitar Berbatov មិនគិតថាលោក Pochettino នឹងចាកចេញពី Spurs នោះទេ ព្រោះប្រធានក្លឹបគឺលោក Daniel Levy ច្បាស់ជាមិនបណ្ដោយឲ្យរឿងមួយនេះកើតឡើងឡើយ។
កីឡាករ Dimitar Berbatov ដែលធ្លាប់មានប្រវត្តិចរចាជាមួយលោក Levy បានប្រាប់សារព័ត៌មាន Goals កាលពីថ្ងៃអាទិត្យថា៖ “ក្លឹបបានផ្ដល់គ្រប់យ៉ាងតាមដែលអ្នកចាត់ការចង់បានដូចជា ក្រុមមួយដ៏ល្អ ទីលានហ្វឹកហាត់ល្អ កីឡដ្ឋានធំទូលាយ និងទំនើបដែលពួកគេនឹងទទួលបានជាដើម។ អ្វីដែលពួកគេត្រូវការនោះគឺពានរង្វាន់ រឿងនេះអ្នកចាត់ការដឹងច្បាស់ហើយ គឺគាត់ចង់ឈ្នះបានពានរង្វាន់ និងតំណែងជើងឯក”។
“ក្រៅពីនេះ អ្វីក៏គាត់មានដែរ។ ខ្ញុំសង្ឃឹមថាគាត់នឹងនៅទីនេះបន្តទៀត។ ខ្ញុំបាននិយាយជាមួយមនុស្សជាច្រើន នរណាក៏និយាយពាក្យល្អអំពីគាត់ដែរ។ ដើម្បីឲ្យ Spurs អាចរីកលូតលាស់ដល់កម្រិតខ្ពស់មួយដែលគេចង់បាន ពួកគេត្រូវការលោក Pochettino នៅទីនេះបន្តទៀត”។
By: DIG88sport
0 Comments