Arjen Robben បានបញ្ជាក់ថា គាត់នឹងចាកចេញពីក្លឹប Bayern Munich នៅចុងរដូវកាលនេះ ក្រោយពីបានរួមរស់ជាមួយក្លឹបមួយនេះអស់រយៈពេល ១០ឆ្នាំ។
Robben បានផ្ទេរមកលេងនៅទឹកដី Allianz Arena កាលពីខែសីហាឆ្នាំ២០០៩ ក្រោយពេលដែលគាត់យល់ឃើញថាគាត់ចាប់ផ្ដើមបាត់បង់ប្រជាប្រិយភាពនៅក្លឹប Real Madrid ដោយសារវត្តមានរបស់កីឡាករ Cristiano Ronaldo និង Kaka។
កីឡាករជម្រើសជាតិហូឡង់រូបនេះបានរីករាយជាមួយពេលវេលាជិត ១០ឆ្នាំជាមួយក្លឹប Bayern ដោយបានឈ្នះពាន Bundesliga ៧រដូវកាល និងពាន DFB-Pokals ៤រដូវកាលផងដែរ។
ជោគជ័យរបស់ Robben បានចាប់ផ្ដើមនៅពេលដែលគាត់រកបានគ្រាប់បាល់នៅនាទីទី៨៩ ដែលជួយឲ្យ Bayern Munich ឈ្នះក្លឹប Borussia Dortmund ក្នុងលទ្ធផល ២ទល់នឹង១ ក្នុងរដូវកាល ២០១២-២០១៣ ក្នុងការប្រកួតផ្ដាច់ព្រ័ត្រឆេមពានស៍លីគ នៅមួយឆ្នាំបន្ទាប់ពី Bayern Munich ចាញ់ Chelsea ដោយបាល់ប៉េណាល់ទី។
ប៉ុន្តែកីឡាករដែលមានវ័យ ៣៤ឆ្នាំរូបនេះបានបញ្ជាក់ថា រដូវកាលនេះជារដូវកាលចុងក្រោយដែលគាត់លេងឲ្យក្លឹបយក្សដែលមានមូលដ្ឋាននៅបាវ៉ារៀនេះហើយ។
ពេលសម្ភាសន៍ជាមួយសារព័ត៌មាន Omnisport កីឡាករ Robben បាននិយាយថា៖ “នេះជាឆ្នាំចុងក្រោយរបស់ខ្ញុំនៅ Bayern”។
“វាគឺជារយៈពេល ១០ឆ្នាំដ៏រីករាយ។ ប៉ុន្តែឥឡូវនេះដល់ពេលដែលត្រូវចាកចេញហើយ”។
Dig88sport
0 Comments