Ronaldo ក៏បានបង្កើតកំណត់ត្រាថ្មីមួយទៀត ដោយក្លាយជាកីឡាករ Juventus ដំបូងគេក្នុងប្រវត្តិសាស្ត្ររបស់ក្លឹបដែលរកបាន ៩ គ្រាប់ ពីការបង្ហាញខ្លួន ១៣ លើក ក្នុងរយៈពេល ៥០ ឆ្នាំចុងក្រោយនេះ។
កីឡាករព័រទុយកាល់រូបនេះ ពេលបានទៅដល់លីគកំពូលអ៊ីតាលី ប្រៀបបានដូចត្រីបានចូលដល់ក្នុងទឹក ដែលជួយឲ្យគេរកបានគ្រាប់បាល់យ៉ាងឆាប់រហ័ស និងជួយឲ្យក្លឹបថ្មីរបស់គេទទួលបានជ័យជម្នះជាបន្តបន្ទាប់។
Ronaldo បានជួយឲ្យ Juventus ធ្វើដំណើរក្នុងរដូវកាលថ្មីនេះដោយរលូន គឺមិនធ្លាប់ស្គាល់ពាក្យថាចាញ់ ដែលប្រៀបបាននឹងការប្រណាំងដែលមានសេះតែមួយក្បាលអញ្ចឹងដែរ ដែលពេលនេះ Juventus មានពិន្ទុនាំមុខក្លឹបនៅលេខរៀងទីពីរ គឺ Napoli រហូតដល់ ៨ ពិន្ទុ ឯណោះ។
ក្រោយបានចុះកុងត្រាផ្លាស់ពី Real Madrid មកកាន់ក្លឹបក្នុង Serie A នេះ មានមតិលើកឡើងថាយ៉ាងហោចណាស់ក៏រូបគេត្រូវការពេលច្រើនដើម្បីបន្សាំខ្លួនជាមួយក្លឹបថ្មីនេះដែរ តែការលើកឡើងខាងលើនេះមិនសូវត្រូវប៉ុន្មានទេព្រោះថា ថ្វីត្បិតតែ ៣ ប្រកួតដំបូងគេមិនអាចរកបានគ្រាប់បាល់ក្តី ក៏រូបគេបានបង្ហាញទម្រង់លេងដ៏ល្អ ហើយ ចាប់ពីការប្រកួតទី ៤ មកគេអាចរកបានគ្រាប់បាល់ជាបន្តបន្ទាប់។
គ្រាប់បាល់ពេលឈ្នះក្រុម Spal ក៏ជាគ្រាប់បាល់ទី ៤០៧ របស់គេក្នុងអាជីពនៃលីគកំពូលអឺរ៉ុបផងដែរ ដោយវ៉ាដាច់ទាំងកីឡាករ Uwe Seeler ដែលមាន ៤០៦ គ្រាប់ទៀតផង។ រហូតមកដល់ពេលនេះមានតែកីឡាករ ៣ រូបប៉ុណ្ណោះ ដែលនៅនាំមុខកីឡាករម្ចាស់ពានរង្វាន់ Ballon d’Or ៥ សម័យកាលរូបនេះ នោះគឺកំពូលកីឡាករ Jimmy McGrory, Ferenc Puskas និង Josef Bican៕
By: Dig88sport
0 Comments