មានក្លឹបចំនួន៣ ដែលកំពុងឈានទៅមុខបានល្អក្នុងការប្រកួតឆេមពានស៍លីគ ប៉ុន្តែលោក Massimiliano Allegri បាននិយាយថាក្លឹប Barcelona អាចនឹងទទួលបានតំណែងជើងឯកមួយនេះ។
បន្ទាប់ពីឆ្លងកាត់ ៣ប្រកួតនៅក្នុងវគ្គសន្សំពិន្ទុរួចមក ក្លឹប Barcelona ក្លឹប Juventus និងក្លឹប Borussia Dortmund ជាក្លឹបដែលទទួលបានលទ្ធផលល្អបំផុត។
ក្លឹប Juventus អាចនឹងឈានទៅវគ្គបន្ទាប់ ក្រោយពេលទទួលភ្ញៀវ Manchester United ក្នុងពូល H នៅថ្ងៃពុធ ហើយ Juventus ក៏បានយកឈ្នះលើក្រុម Valencia និង Young Boys មុនទទួលបានលទ្ធផលឈ្នះ 1-0 នៅទឹកដី Old Trafford ផងដែរ។
ប៉ុន្តែទោះបីជាការទិញកីឡាករ Cristiano Ronaldo អាចជួយបង្កើនឱកាសទទួលបានតំណែងជើងឯកឆេមពានស៍លីគជាលើកដំបូង បើគិតចាប់ពីឆ្នាំ១៩៩៦ ក៏ដោយ ក៏លោក Allegri មានអារម្មណ៍ថា ក្លឹប Barcelona ជាក្លឹបដែលឈានមុខគេក្នុងការប្រជែងមួយនេះ។
លោក Allegri បានប្រាប់អ្នកសារព័ត៌មានមុនការប្រកួតជាមួយភ្ញៀវ Cagliari នៅថ្ងៃស្អែកថា៖ “ក្រុមដែលអាចនឹងក្លាយជាជើងឯកឆេមពានស៍លីគឆ្នាំនេះគឺ Barcelona ប៉ុន្តែពួកយើងនៅក្នុងចំណោមក្រុម៤ ដែលឈានមុខគេ”។
“នៅថ្ងៃស្អែកនេះ យើងត្រូវការជ័យជម្នះ ហើយចង់ឈ្នះគឺមិនងាយស្រួលនោះទេ ដូចដែលយើងបានឃើញការប្រកួតជាមួយក្លឹប Empoli ស្រាប់ហើយ។ គូប្រកួតរបស់យើងមានវត្ថុបំណងរបស់គេ ហើយគេនឹងប្រឹងប្រែងអស់លទ្ធភាពដើម្បីប្រកួតជាមួយយើង។ យើងមិនអាចបាត់បង់ពិន្ទុនោះទេ”។
“យើងត្រូវគិតដល់លីគ Serie A ច្រើនជាង ព្រោះនៅក្នុងឆេមពានស៍លីគ ការផ្ដោតអារម្មណ៍កើតឡើងដោយស្វ័យប្រវត្តិរួចជាស្រេចទៅហើយ មានចំនួនប្រកួតតិចជាង Serie A ប៉ុន្តែសុទ្ធតែជាការប្រកួតដែលពិបាកទាំងអស់។ ហេតុនេះហើយ យើងតែងតែត្រូវបង្ហាញការគោរព និងផ្ដោតអារម្មណ៍ឲ្យបានល្អជានិច្ច”។
“Cagliari ជាគូប្រកួតមួយដ៏ពិបាក។ ពួកគេជាក្រុមដែលមុតស្រួចនៅក្នុងតំបន់គ្រោះថ្នាក់។ ពួកគេរហ័សរហួន ហើយកីឡាករ Leonardo Pavoletti ពូកែខាងលេងបាល់សិតភីស (set-pieces)។ បើយើងឲ្យគេស៊ុតចូលសរុបលើសពី ៣០គ្រាប់ យើងមិនអាចទទួលបានតំណែងជើងឯកនោះទេ ហេតុនេះនៅក្នុងការប្រកួតនៅថ្ងៃស្អែក យើងមិនអាចឲ្យគេស៊ុតចូលបានទេ”។
កីឡាករ Mario Mandzukic និង Sami Khedira អាចចូលលេងបាននៅថ្ងៃស្អែក ប៉ុន្តែកីឡាករខ្សែការពារសំខាន់ Giorgio Chiellini និងកីឡាករស្លាប Federico Bernardeschi នឹងត្រូវអវត្តមាន។
លោក Allegri បាននិយាយថា៖ “នៅផ្នែកខ្សែបម្រើ ទាំង Miralem Pjanic និង Blaise Matuidi នឹងចូលលេង។ សម្រាប់ជម្រើសទី៣ ខ្ញុំនឹងជ្រើសរើសរវាង Rodrigo Bentancur, Juan Cuadrado និង Sami Khedira។ នៅផ្នែកការពារមាន Joao Cancelo និង Leonardo Bonucci ហើយខ្ញុំនឹងជ្រើសរើសរវាង Mattia De Sciglio និង Alex Sandro នៅផ្នែកខាងឆ្វេង។
“នៅផ្នែកប្រយុទ្ធខាងមុខ យើងមាន Cristiano ហើយខ្ញុំត្រូវជ្រើសរើសកីឡាករដែលត្រូវលេងជាមួយគេ រវាង Paulo Dybala, Mario Mandzukic និង Douglas Costa។ អ្នកចាំទីគឺ Wojciech Szczesny ទោះជា Mattia Perin ធ្វើបានល្អក៏ដោយ ៕
BY: Dig88sport
0 Comments